الله يلعن أبو التدوين
أنا أساساً بكتب عشان اقنع نفسي .. واثبت رجلي وأتأقلم علي نوعية معينة من الحياة ,, في الظل .. ببساطة .. مع الله
عشان قلبي يشرب التوكل .. ويسيبها علي الله .. وميفكرش في بكره .. أو امبارح أو حتي النهاردة ..
بس يموت الزمار وصوابعه بتلعب ..
بلاقي نفسي حبة حبة ... بتتحول لغة كتابتي إلي الجعلصة .. والتفكير ,, والمنطقة ,.. وترتيب الأفكار .. والاستنباط ..
بص الكلمات الوسخة .. تاني حيقولي منطقة واستنباط ..
يابني فسي دماغك .. وافكس لحوارات الثقافة دي .. وربن ماهي جايبة همها ..
وتلاقي المواضيع بتتطول معايا وتمط .. واللي ممكن يخلص في سطرين يخلص في ميت سطر ..
يادي النيلة .. يعني حتدور حوالين نفسك .
بس شيء كويس أنك لقطت المشكلة .. قبل ما تتزحلق تاني ...
الحل .. افكس ومتفكرش كتير .. وخلي شعارك دايماً ولا يشغلني ..
أه ولا يشغلك .. لا كتاب .. ولا موضوع .. ولا أغنية .. ولا حلقة فاتتك .. ولا محاضرة .. ولا جنيه .,,
ولا حاجه خالص
اكتف بالقرآن ومساحتك من الحياة ,, ومتبصش لحد .. عشان حياتك متنغصش عليك ..
وابوس ايد اللي جابك .. متجعلصهاش تاني ..
فوكها .. الكلام جميل .. بس بلاش اسلوب العرض الفلسفي .. عاوز حاجة تخش النخاشيش .. مباشرة .. سلسة وسهلة ..
(يسروا ولا تعسروا) (إن منكم لمنفرين) ( ماخير ارسول بين أمرين إلا اختار أيسرهما)
ليست هناك تعليقات:
إرسال تعليق